Ռուսաստանի նախագահի մամուլի քարտուղար Դմիտրի Պեսկովն ասել է, որ որպես պաշտոնյա ինքը պատրաստ է ամեն ինչի: Պեսկովը այսպես է պատասխանել Լադա մակնիշի ավտոմեքենա տեղափոխվելու պատրաստակամության մասին հարցին։
«Գիտեք, ես՝ որպես պետական ծառայող, պատրաստ եմ ամեն ինչի, և մեր երկրի յուրաքանչյուր քաղծառայող պատրաստ է ամեն ինչի»,- մամուլի ասուլիսի ժամանակ պատասխանելով լրագրողների համապատասխան հարցին՝ ասել է Պեսկովը։
Ավելի վաղ ֆինանսների նախարար Անտոն Սիլուանովը Սանկտ Պետերբուրգի միջազգային տնտեսական ֆորումում (SPIEF) ավտոարտադրողներին աջակցելու մասին ելույթի ժամանակ ասել էր «Եթե պետական աշխատողներին տեղափոխենք «Լադա…» արտահայտությունը, սակայն կիսատ էր թողել միտքը։
Պեսկովը նշել է, որ ֆինանսների նախարարության ղեկավարը հունիսի 16-ին կմասնակցի Վլադիմիր Պուտինի հետ ավտոմոբիլային արդյունաբերության զարգացմանը նվիրված հանդիպմանը։ «Եթե նա (ֆինանսների նախարար Անտոն Սիլուանովը) նպատակահարմար համարի, ապա կբարձրացնի այդ հարցը»,- ասել է նախագահի մամուլի քարտուղարը։
