ԱՄՆ-ը շարունակում է խոչընդոտել իրանական միջուկային համաձայնագրի վերականգնմանը՝ փորձելով բանակցել իր համար լրացուցիչ պայմանների շուրջ: Այս մասին այսօր հայտարարել է Ռուսաստանի արտգործնախարար Սերգեյ Լավրովը։
«Որոշ խոչընդոտներ են առաջացել, առաջին հերթին, կապված Միացյալ Նահանգների դիրքորոշման հետ, որը փորձում է բանակցել լրացուցիչ պայմանների շուրջ՝ դրանով իսկ փոխելով ՄԱԿ-ի Անվտանգության խորհրդի կողմից հաստատված համատեղ համապարփակ գործողությունների ծրագրի սկզբնական գաղափարը և բուն բովանդակությունը»,- նշել է Լավրովը: «Մենք ելնում ենք այն նախադրյալից, որ արդարադատությունը պահանջում է JCPOA-ի վերականգնում առանց որևէ բացառության, առանց որևէ լրացումների», — ընդգծել է ռուս նախարարը Բահրեյնի արտգործնախարարի հետ բանակցություններից հետո կայացած մամուլի ասուլիսի ժամանակ։
2015 թվականին Միացյալ Թագավորությունը, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը կնքեցին միջուկային համաձայնագիր՝ JCPOA, որը ներառում էր պատժամիջոցների վերացում՝ Իրանի միջուկային ծրագրի սահմանափակման դիմաց: 2018 թվականի մայիսին ԱՄՆ-ի այն ժամանակվա նախագահ Դոնալդ Թրամփը դուրս եկավ Գործողությունների համատեղ համապարփակ ծրագրից և վերականգնեց Թեհրանի դեմ պատժամիջոցները։ Ի պատասխան՝ Իրանը հայտարարեց համաձայնագրով իր պարտավորությունների փուլային կրճատման մասին՝ հրաժարվելով միջուկային հետազոտությունների, ցենտրիֆուգների և ուրանի հարստացման մակարդակի սահմանափակումներից։
